غلام عباس جٹ — شانِ ساہیوال

ہڑپہ ضلع ساہیوال کے نامور ایتھلیٹ، اولپئین غلام عباس جٹ!

پاکستان کے نامور ایتھلیٹ غلام عباس جٹ 19 مارچ 1968ء کو ہڑپہ، ضلع ساہیوال میں پیدا ہوئے۔ ایک سادہ گھرانے سے تعلق رکھنے والے غلام عباس نے اپنی محنت، لگن اور غیرمعمولی صلاحیت کے ذریعے قومی و بین الاقوامی کھیلوں میں نمایاں مقام حاصل کیا۔ ان کا خصوصی میدان 110 اور 400 میٹر رکاوٹوں کی دوڑ تھا۔

انہوں نے 1989ء کے اسلام آباد ساؤتھ ایشین گیمز میں 110 اور 400 میٹر ہرڈلز کے دونوں مقابلوں میں طلائی تمغے حاصل کیے۔ ان کے کھیلوں کے سفر کا سب سے یادگار لمحہ 1990ء کے بیجنگ ایشین گیمز میں آیا، جہاں انہوں نے 400 میٹر رکاوٹوں کی دوڑ 50.15 سیکنڈ میں مکمل کرکے پاکستان کے لیے طلائی تمغہ جیتا۔ 1991ء میں انہوں نے ساؤتھ ایشین گیمز میں مزید دو طلائی تمغے اور ایشین ایتھلیٹکس چیمپئن شپ میں چاندی کا تمغہ حاصل کیا۔

غلام عباس نے 1991ء کی عالمی ایتھلیٹکس چیمپئن شپ اور 1992ء کے بارسلونا اولمپکس میں بھی پاکستان کی نمائندگی کی۔ 400 میٹر ہرڈلز میں ان کا بہترین وقت 50.14 سیکنڈ ریکارڈ ہوا۔

غلام عباس جٹ جیسا ہیرا واقعی ہڑپہ کی تاریخی دھرتی کا سرمایہ اور ضلع ساہیوال کی شان ہے۔